Plattdütsche Bühn' Tangstedt e.V.

... und so berichtet die Presse über die Plattdütsche Bühn' Tangstedt e.V.

De lüttje Wippsteert

De Plattdütsche Bühn´ Tangstedt e.V. in Stormarn fier mit dissen Schwank vun Franz Arnold un Ernst Bach ehr dörtigjohrig Bestahn. Un dat - as jümmers - vör vullen Saal in de "Wilstedter Mühle", de vun Beginn an ehr Heimat is.
"De lüttje Wippsteert" (Die spanische Fliege) leevt vun flott Speel un Aktschoon. Man künn dat Stück ok "Keen is denn nu de Vadder?" nömen, so en Kuddelmuddel gifft dat um en Techtelmechtel vör 25 Johrn. Sempfabrikant Wilhelm Cordes meent, dat he allns in´n Griff hett, man dor kümmt - binah - sien kort Siedensprung mit ´n lütt Dänzerin rut, un dat bi en Ehefru, de de Vörsittersch vun den hiesigenSittlichkeitsvereen is. Man is he würlich de Vadderor gifft dat noch anner Kandidaten? Dorto kümmt ok noch, dat de Dochter Lene sik ´n annern jungen Mann ton Heiraden utsöcht hett as ehr Mudder. Dat Dörcheenanner is komplett.
All Speelers sünd mit soveel Vörgnögen un Können dorbi, dat dat Tokieken en reine Freid is. De Speelbaas Georg Sellhorn, de ok de Regie hett, is de Sempfabrikant Cordes, de in böös Bedrullje kümmt. Sein Heemlich Söhn is in Anmarsch un he is dull bang för sien leeve Fru! He speelt dat mit soveel Hengaav, dat man em glöövt, dat he jümmers kort vör´n "Daalslag" is. Roswitha Wegner is sien Frau Meta, jümmers fein in Kledaasch, Näs in de Luft, hett allns in Griff - Mann, Dochter, Deenstdeern un den Rest vun de bucklig Verwandschop. Silke Miethe is de smucke Dochter mit´n egen Kopp - ´n richtig dööte Deern. Wosück se dat henktiggt, doch ehrn Assessor Gerd Bruns to kriegen - dor kickt man ehr geern to. De Assessor is bi Daniel Ritter bestens ophaven. He is sowat vun aapig un allglatt. Man wo de Leev henfallt…Denn is dor noch Heinrich, en Student ut Sachsen. Thomas Junge, mit´n Tungenslag ut Halle/Saale, speelt em grootardig. He hett sik in Thilde , de Kusine vun Lene , verkeken un de speelt Bianca Helbrecht best. Se het vell Bühnenpräsens, bruukt blots mit de Ogen to plinkern un dat Publikum is hen. Dorto kaamt noch dree Mannslüüd, de ok villicht as Vadder gelln könnt, un de sünd bi Reiner Westphal as Polizeideener a.D., Lothar Haase as Karkendeener un Raymund Haesler as Schoolmester in beste Hannen. Ok de lütten Rullen, all sünd se rundum goot besett. Dorto kümmt en Bühnenbild vun´t Feinste. Hett Georg Sellhorn utdacht un opbuut. Un denn de Kledaasch! Man kann sik gor nich satt sehn. Sniederin Angelika Sellhorn hett sik klook maakt, wat des Fruuns- un Mannslüüd so um 1900 dragen hebbt, un dat hett se mit veel Pfiff smuck neiht. Am leevsten müch man dat allns mit na Huus nehmen.
De ganze Opföhren is glückt. Dormit maakt de Plattdütsche Bühn´ ehrn 30. Geburtsdag groot Ehr. Man kann för de Tokunft blots wiederhen so´n gode Hand un so ´n gode Mannschop wünschen. Gratulatschoon! (Christa Heise-Batt)

1. Quartal 2008 - Quickborn, Zeitschrift für plattdeutsche Sprach und Literatur

Letzte Aktualisierung dieser Seite am

20.08.2008